Reuters

Bretar vinna hörðum höndum að rannsókn á manninum sem reyndi að sprengja sig upp í flugi til Bandaríkjanna á jóladag en hann bjó um tíma í Lundúnum. Eftirlit hefur verið aukið á fjölmörgum flugvöllum í heiminum vegna málsins.

Lögreglan hefur í gær og í dag rannsakað íbúð sem Nígeríumaðurinn Umar Farouk Abdulmutallab er talinn hafa búið. Svo virðist sem tilræði Abdulmutallab hafi verið skipulagt í Jemen af félögum í al-Qaeda, sem hafi jafnvel saumað sprengjuna í nærföt Abdulmutallabs. Honum tókst hins vegar ekki að sprengja sprengjuna eins og til stóð og þess í stað kviknaði í fötum hans.

Þykir málið hin mesta hneisa fyrir bresk yfirvöld en það orð fer af Lundúnaborg að hún sé uppeldisstöð fyrir hryðjuverkamenn sem koma frá Pakistan og Afganistan. Er bent á að skósprengjumaðurinn, Richard Reid er fæddur og uppalinn í Lundúnum. Reid hugðist kveikja í sprengiefni sem hann geymdi í skóm sínum er hann flaug frá París til Miami árið 2001.

Breska lögreglan að störfum Reuters