Margaret Chan Reuters

Margaret Chan, forstjóri Alþjóðaheilbrigðismálastofnunarinnar (WHO), segir enn of snemmt að lýsa sigri yfir svínainflúensuveirunni. Hún telur að aðgerðir sem gripið var til gegn faraldrinum hafi verið réttlætanlegar.

Chan sagði í samtali við svissneska dagblaðið Le Temps að fylgjast þurfi með þróun heimsfaraldursins næstu 12 mánuði áður en hægt verður að lýsa yfir sigri í baráttunni við svínainflúensuna. 

Hún sagði að þótt veikin hafi náð hámarki á norðurhveli jarðar, t.d. í Kanada og Bandaríkjunum, sé fjarri því að faraldurinn sé afstaðinn í ýmsum öðrum löndum. Chan sagði að veturinn væri ekki úti enn og bætti við að heildarmynd af áhrifum svínaflensunnar yrði ekki ljós fyrr en eftir tvö ár. 

Staðfest er að a.m.k. 11.516 einstaklingar hafi látist af völdum A(H1N1) veirunnar frá því hún fannst fyrst í mars síðastliðnum.  Ör útbreiðsla inflúensunnar sem veiran olli varð til þess að WHO lýsti yfir faraldri í júní s.l.

Sjúkdómurinn varð vægur hjá miklum meirihluta sjúklinga og hefur WHO verið gagnrýnd fyrir að hafa brugðist of harkalega við. Chan varði þá ákvörðun og sagði að stofnunin hafi leitað ráða hjá sjálfstæðum og óháðum ráðgjöfum áður en faraldri var lýst yfir. 

Chan sagði einnig að flestir hafi búist við að næsti heimsfaraldur inflúensu yrði af völdum H5N1 fuglaflensuveirunnar. Um 60% þeirra sem veikjast af henni deyja af völdum sjúkdómsins. 

Þótt svínaflensufaraldurinn hafi stuðlað að auknum flensuvörnum hjá flestum þjóðum sagði Chan að heimurinn sé ekki viðbúinn því að takast á við heimsfaraldur af völdum fuglaflensu. Hún kvaðst vona að aldrei kæmi til þess að takast þyrfti á við faraldur af völdum fuglainflúensu.