Þessar nígerísku fótboltabullur eru ekki hryðjuverkamenn frekar en flestir aðrir Nígeríumenn. AFOLABI SOTUNDE

Íslendingar eru ekki þeir einu sem líkar illa við að vera kallaðir hryðjuverkamenn. Nú hefur hópur, verið stofnaður á Facebook, ekki ósvipaður framtaki InDefence manna á Íslandi, undir heitinu „Nígeríubúar eru EKKI hryðjuverkamenn" og hafa yfir 43.000 manns þegar skráð sig í hópinn, sem var stofnaður af þarlendum blaðamanni.

Í efnislýsingu hópsins er sprengjutilræði Nígeríumannsins Umar Farouk Abdulmutallab á jóladag fordæmt og hann sagður skemmt epli sem sverti enn ímynd Nígeríu sem hafi þó verið slæm fyrir. „Nígeríumenn eru gott fólk, við erum ekki hryðjuverkamenn, við elskum lífið!" segir á síðunni.

„Ég stofnaði þennan hóp vegna þess að við höfum um árabil þurft að þola fyrirlitningu umheimsins á Nígeríu og Nígeríumönnum vegna verka örlítils minnihluta þessarar friðelskandi þjóðar," hefur AFP eftir stofnandanum, Henry Omoregie.

„Allt það skynsama fólk utan Nígeríu sem sér viðbrögð okkar á þessari síðu ættu að sjá hvernig raunverulegar tilfinningar okkar góðu þjóðar eru gagnvart þessum skelfilega verknaði." Hundruð athugasemda hafa þegar verið birt á „vegg" síðunnar þar sem flestir lýsa reiði sinni á sprengjutilræðinu í flugvélinni til Detroit sem hafði nærri 300 manns um borð.