Lögregla í Espoo í Finnlandi staðfestir að maður, sem hóf skothríð í verslunarmiðstöð í borginni, hafi fundist látinn. Maðurinn varð fjórum að bana í verslunarmiðstöðinni og einnig fannst fyrrverandi unnusta mannsins látin í húsi í Espoo.

Árásarmaðurinn hét Ibrahim Shkupolli og var 43 ára. Unnusta hans mun hafa starfað í verslunarmiðstöðinni Sello þar sem maðurinn hóf skothríðina. Þar létu þrír karlmenn og ein kona lífið. 

Fyrrum unnusta Shkupolli hafði fengið sett á hann nálgunarbann eftir að hann ofsótti hana.  Lík hennar fannst í húsi í Espoo. Maðurinn notaði skammbyssu þegar hann hóf skothríð í verslunarmiðstöðinni en þar inni voru margir að gera áramótainnkaup. Mikið uppnám varð í byggingunni en lögregla rýmdi húsiðí kjölfarið.

Shkupolli, sem flutti til Finnlands frá Kosovo fyrir áratug, hefur áður fengið dóma fyrir brot gegn vopnalögum.  Hann fannst látinn í íbúð sinni og hafð svipt sig lífi.

Þetta er þriðja fjöldamorðið sem framið er í Finnlandi á tveimur árum þar sem mikil umræða er nú hafin um skotvopnaeign. Í september 2008 réðist 22 ára gamall maður  inn í skólastofu og skaut 9 námsmenn og kennara og svipti sig síðan lífi. Þá  Skaut 18 ára gamall námsmaður sex nemendur og einn kennara til bana í skóla í nóvember 2007. Hann svipti sig einnig lífi.