Mikil sorg ríkir í Finnlandi í dag en í gær skaut karlmaður fyrrum unnustu sína og fjóra vinnufélaga hennar til bana áður en hann tók eigið líf. Er talið að hann hafi framið morðin í afbrýðikasti þar sem hann hélt að hún ætti í ástarsambandi við vinnufélaga sinn í bænum Espoo sem er í útjaðri höfuðborgar landsins, Helsinki.

Telja vitni að morðinginn, Ibrahim Shkupolli, hafi ekki myrt fórnarlömbin af tilviljun heldur hafi hann ekki beint byssu að neinum öðrum en þeim sem hann myrti í verslunarmiðstöðinni en fyrrum unnusta hans starfaði þar. 

Fyrrum unnusta Shkupolli hafði fengið sett á hann nálgunarbann eftir að hann ofsótti hana.  Lík hennar fannst í húsi í Espoo. Maðurinn notaði skammbyssu þegar hann hóf skothríð í verslunarmiðstöðinni en þar inni voru margir að gera áramótainnkaup. Mikið uppnám varð í byggingunni en lögregla rýmdi húsiðí kjölfarið.

Shkupolli, sem flutti til Finnlands frá Kosovo fyrir áratug, hefur áður fengið dóma fyrir brot gegn vopnalögum.  Hann fannst látinn í íbúð sinni og hafð svipt sig lífi.

Þetta er þriðja fjöldamorðið sem framið er í Finnlandi á tveimur árum þar sem mikil umræða er nú hafin um skotvopnaeign. Í september 2008 réðist 22 ára gamall maður  inn í skólastofu og skaut 9 námsmenn og kennara og svipti sig síðan lífi. Þá  Skaut 18 ára gamall námsmaður sex nemendur og einn kennara til bana í skóla í nóvember 2007. Hann svipti sig einnig lífi.