Kurt Westergaard. SCANPIX DENMARK

Lögregla í Danmörku skaut og særði í kvöld mann, sem reyndi að brjótast inn á heimili Kurts Westergaards, eins af teiknurunum, sem teiknuðu umdeildar myndir af Múhameð spámanni múslima. Maðurinn var vopnaður öxi, að sögn lögreglu.

Westergaard var heima hjá sér ásamt 5 ára gamalli dótturdóttur í bænum Viby, nálægt Árósum, þegar maðurinn og tveir aðrir reyndu að komast inn í húsið. Þjófavarnakerfi fór af stað.  Westergaard leitaði skjóls á baðherbergi, sem hefur verið innréttað sem einskonar öryggisherbergi. Hann hringdi í lögreglu sem kom á staðinn um 3 mínútum síðar. 

Fram kemur í dönskum fjölmiðlum, að þegar lögregla kom á staðinn kom árásarmaðurinn út úr húsinu og réðist á lögreglubíl með öxi og hníf. Lögreglan skaut hann þá og særði.  Maðurinn var fluttur á sjúkrahús. Um er að ræða 28 ára gamlan Sómala, sem tengist Shebab hryðjuverkahreyfingunni í Sómalíu og al-Qaeda, að sögn dönsku lögreglunnar. Sprengjusérfræðingar leituðu að sprengju í húsi Westergaards í kjölfarið. 

Westergaard var einn 12 teiknara, sem teiknuðu skopmyndir af Múhameð spámanni fyrir Jótlandspóstinn árið 2005. Myndirnar vöktu mikla reiði meðal múslima, einkum mynd Westergaards, sem sýnir spámanninn með sprengju í túrban sínum. Í kjölfarið var danski fáninn brenndur í víða í múslimaríkjum og reynt var að kveikja í sendiráðum Dana í Damaskus og Beirút.   

Kurt Westergaard teiknaði umdeilda mynd af Múhameð spámanni.