Kanadískir hermenn í Kandahar. FINBARR O'REILLY

Fjórir bandarískir hermenn fórust í sprengingu í suðurhluta Afganistan í gær. Þetta kemur fram í tilkynningu frá Atlantshafsbandalaginu. Sprengingin varð á svæði þar sem ólga er mikil og líklegt að Talibanar hafi staðið fyrir sprengingunni. Mennirnir fjórir eru þeir fyrstu sem falla í stríðinu í Afganistan á þessu ári.

Sprengjan var heimatilbúin, en slíkar sprengjur eru það vopn sem grandar langflestum í stríðinu í Afganistan.

Sjö CIA útsendarar voru drepnir á miðvikudag, af sjálfsmorðssprengjumanni sem sprengdi sig í loft upp á herstöð í Khost-héraði. Mikið mannfall hefur verið í Afganistan að undanförnu, í röðum NATO-hermanna.

Sprengingin sem hér um ræðir varð á svæði sem nefnist Panjawi og er í Kandahar héraði. Talsmaður Talibana, Yousuf Ahmadi hringdi í blaðamann AFP. „Við lýstum ábyrgð á þessari árás á hendur okkur,” sagði hann og gaf upp sömu staðsetningu og lögreglan.

Á síðasta ári féllu 522 erlendir hermenn í Afganistan, en það er mesta mannfall síðan árið 2001, þegar Bandaríkjamenn réðust inn í landið. Nú eru yfir 110 þúsund hermenn í landinu, bæði undir stjórn Bandaríkjahers og undir stjórn NATO. Áætlanir gera ráð fyrir að herliðinu fjölgi í 150 þúsund á þessu ári, í tilraun Baracks Obama Bandaríkjaforseta til að snúa dæminu við og ráða niðurlögum uppreisnarmanna Talibana.