Búið er að herða allt eftirlit á alþjóðaflugvellinum í Frankfurt, sem er stærsti flugvöllur Þýskalands, í kjölfar misheppnaðrar tilraunar til að sprengja bandaríska farþegaþotu yfir Detroit á jóladag.

Bandaríkjastjórn bað flugvallaryfirvöld og flugfélög um allan heim að herða allt eftirlit í kjölfar atviksins.

Spurningum er enn ósvarað hvernig árásarmanninum, sem er 23 ára Nígeríumaður, tókst að koma sprengiefni inn í farþegavélina, en eftirlit á flugvöllum var hert til mun í kjölfar hryðjuverkaárásanna á Bandaríkin 11. september 2001.

Yfirmenn öryggismála á flugvellinum í Frankfurt segja að um eðlilegar ráðstafanir sé að ræða. „Eftirlitið, sem þegar var mikið, var hert eftir atvikið í Detroit. Þetta þýðir að ferðamenn mega eiga von á líkamsleit oftar en einu sinni, og að handfarangur verði skoðaður aftur,“ segir Nicole Ramrath, sem er yfirmaður löggæslumála á vellinum.

Farþegar sem eiga leið um flugvöllinn eru jákvæðir þrátt fyrir hert eftirlit. 

„Þetta er nauðsynlegt. Því miður, þá er aukin hætta á ferð og þetta er eitthvað sem fólk verður að þola. Ég er ánægður með það hve kerfið er virkt hérna og ég vil frekar vilja eyða meiri tíma í ferðalagið og allt sé öruggt heldur að eitthvað slæmt gerist,“ segir ferðamaðurinn Calvin Uchida.  

„Öryggismálin trufla mig ekki. Að mínu mati snýst þetta um öryggi okokar og það truflar mig ekki,“ segir ferðalangurinn Nancy Anderson.

Meðal þeirra öryggisráðstafna sem gripið hefur verið til eru líkamsskannar og þá hefur eftirlit með farþegum frá 14 löndum verið sérstaklega hert. Nígería, Afganistan, Pakistan og Jemen eru á meðal þeirra ríkja.