Bóndi rekur nautgripi yfir veginn nærri Kolkata á Indlandi. Reuters

Meira en fjörutíu manns hafa látist í kuldakasti sem verið hefur í norðurhluta Indlands. Viðbrögð stjórnvalda í dag voru þau að loka þúsundum skóla og að útdeila eldiviði til fólks, að sögn embættismanna þar í landi.

Fjölmennasta hérað Indlands, Uttar Predesh, hefur 30 staðfest andlát vegna kulda síðan í fyrradag, að sögn Soren Srivastava, talsmanns lögreglunnar í Lucknow, stærstu borginni í Uttar Pradesh. Stjórnvöld í Uttar Pradesh ákváðu því að eyða 100 milljón rúpíum í að dreifa ókeypis teppum og langþráðum eldiviði til hinna þurfandi í héraðinu, sem á landamæri að Nepal.

Flestir hinna látnu eru útigangsfólk. Á nóttunni hefur verið fjögurra til níu stiga frost. Embættismaðurinn Diwakar Tripathy tjáði AFP fréttastofunni að stefnt væri að því að flytja heimilislausa inn á opinber næturskýli. Heimildum ber ekki öllum saman um hversu margir hafi látist í kuldanum og segja sumar heimildir, aðrar en þær opinberu, að hinir látnu séu nær sextíu talsins.

Um helgina hafði kuldinn mikil áhrif á ferðaáætlanir flugvéla og járnbrautarlesta. Henni fylgdi meðal annars mikil þoka, sem hafði þær afleiðingar að þrjú lestarslys urðu sem kostuðu tíu manns lífið.
Talsmaður flugvallarins í Nýju Delí, Anirudh Chatterjee, sagði AFP að 150 flugvélum hefði seinkað vegna kuldans, 50 ferðum aflýst og áætlunum 25 þeirra breytt að öðru leyti vegna veðuraðstæðna.