Björgunarsveitarmenn sjást hér leita að fólki á lífi í svissnesku Ölpunum í gær. Reuters

Á nýju ári hafa 13 látist í miklu kuldakasti í Póllandi og a.m.k. 10 hafa látist í snjóflóðum eða skíðaslysum í Ölpunum að sögn lögreglu og björgunarsveita. Frostið mældist um 25 gráður í Póllandi á nýársdag og alls hafa 122 dáið úr kulda þennan vetur.

Flestir hinna látnu eru heimilislausir karlmenn á aldrinum 35-50 ára. Þeir voru ölvaðir og létust af völdum ofkælingar.

Fimm hafa látist í snjóflóðum sem hafa fallið í svissnesku Ölpunum og þá er þriggja saknað.

Fyrsta flóðið féll í gær í Bernese Ölpunum með þeim afleiðingum að einn skíðamaður lét lífið. Björgunarsveitarmenn voru að leita að fólki á lífi þegar annað flóð féll 30 mínútum síðar.

Þyrlur með læknum, björgunarsveitarmönnum og leitarhundum voru sendar á vettvang. Átta fundust á lífi og voru nokkrir alvarlega slasaðir. Þrír létust á sjúkrahúsi, þar á meðal læknir sem fór á vettvang þegar fyrsta snjóflóðið féll.

Þá fundu leitarmenn lík göngumanns grafið í snjónum á meðan þriggja til viðbótar, tveggja Svisslendinga og eins Þjóðverja, er saknað.

Björgunarstörf gátu ekki hafist á nýjan leik í dag þar sem veðurskilyrði til leitar voru mjög erfið.

Snjóflóð féll í Valais í Sviss með þeim afleiðingum að fjallaleiðsögumaður og ferðamaður grófust undir. Leiðsögumaðurinn slapp lifandi en ferðamaðurinn lét lífið.

Þá lést 32 ára gamall þýskur ferðamaður í umferðarslysi í Ofen-skarði í austurhluta Sviss þegar ökumaður bifreiðar, sem kom úr gagnstæðri átt, missti stjórn á bifreiðinni með þeim afleiðingum að hún rakst beint framan á húsbíl Þjóðverjans.

Í vesturhluta Austurríkis fundust lík tveggja þýskra skíðamanna, sem voru 18 og 19 ára. Þeir höfðu hrapað niður í gljúfur.

Þá létust þrír þegar snjóflóð féll við landamæri Frakklands og Ítalíu sl. föstudag.