Nígeríumaðurinn sem ákærður er fyrir tilraun til að fremja hryðjuverk um borð í flugvél á leið til Detroit á jóladag sagði þegar réttarhöldin yfir honum hófust í gær að hann væri saklaus.

Umar Farouk Abdulmutallab, 23 ára, er meðal annars ákærður fyrir að hafa gert tilraun til að nota gjöreyðingarvopn og fyrir að hafa reynt að myrða 290 manns, sem voru um borð í vélinni. Farþegarnir voru 279 og 11 voru í áhöfn vélarinnar.

Abdulmutallah var með gilda vegabréfsáritun til Bandaríkjanna og fór með flugvél frá Lagos til Amsterdam á jóladag og þaðan til Detroit daginn eftir. Hermt er að sprengiefnið hafi verið saumað í nærfatnað mannsins en kveikibúnaðurinn ekki virkað, þannig að farþegar hafi getað yfirbugað manninn. Eftir þetta hefur eftirlit á flugvöllum verið hert mikið og miklar tafir eru á nánast öllu flugi til Bandaríkjanna.

Bandarísk yfirvöld höfðu fengið upplýsingar um að Nígeríumaður væri að undirbúa hryðjuverk í Bandaríkjunum um jólin nokkrum vikum áður en Abdulmutallab reyndi að sprengja farþegaþotuna í loft upp.

Barack Obama Bandaríkjaforseti gagnrýndi á milli jóla og nýárs bandarískar öryggisstofnanir fyrir að hafa ekki hindrað áform Nígeríumannsins og krafðist skýringa á því hvers vegna honum var ekki bannað að ferðast til Bandaríkjanna.