AP

Þrír karlmenn á fertugsaldri voru í dag dæmdir til langrar fangelsisvistar í Bretlandi fyrir að smygla til landsins heróíni, sem metið var á 6,6 milljarða króna. Um er að ræða mesta magn af heróíni, sem breska lögreglan hefur lagt hald á í einu.

Abdul Rob, sem hlaut þyngsta dóminn, var dæmdur í 23 ára fangelsi, Harminder Chana var dæmdur í 17 ára fangelsi og Atif Khan í 15½ árs fangelsi. Alls var lagt hald á 330 kíló af heróíni í málinu. Áður hafði Hollendingur, Patrick Kuster, verið dæmdur í 26 ára fangelsi fyrir að útvega heróínið.

Fram kemur á fréttavef BBC, að Kuster flutti heróínið frá Hollandi til Bretlands um Ermarsundsgöngin. Faldi hann efnið í skottinu á bíl móður sinnar. Hann ók að bensínstöð í Maidstone í Kent þar sem nokkrir menn biðu hans og ætluðu að taka við heróíninu til dreifingar. 

Lögreglan hafði fylgst með Chana og elti hann að bensínstöðinni. Þar voru mennirnir staðnir að verki við að flytja heróínið á milli bíla.  Khan var síðar handtekinn í úthverfi Lundúna og þar fundust lyklar að „öruggu húsi" þar sem fíkiniefni og ýmis búnaður fannst. Þar fundust einnig gögn um Abdul Rob, viðskiptafélaga Khans, sem reyndist hafa fjármagnað fíkniefnakaupin.