Forseti Kýpur, Demetris Christofias, fyrirskipaði lögreglu að gera hvað sem hægt er til þess að finna morðingja eins helsta fjölmiðlamanns landsins sem var myrtur í einungis 100 metra fjarlægð frá sendiráði Bandaríkjanna, þar sem fyllsta öryggis á að vera gætt.

Antis Hadjicostis var skotinn til bana fyrir utan heimili sitt á mánudagskvöldið og er talið að atvinnumorðingi hafi framið morðið, samkvæmt fréttum Sigma sjónvarpsstöðinni sem var í eigu hins myrta.

Christofias sagði í dag að hann væri náinn vinur Hadjicostis-fjölskyldunnar sem gerði sorgina enn meiri.

Hadjicostis, 42 ára, var forstjóri Dias fjölmiðlasamsteypunnar, sem er eitt stærsta fjölmiðlafyrirtæki eyjunnar. Dias á meðal annars Sigma sjónvarpsstöðina, útvarpsstöðvar, dagblaðið Simerini ofl. fjölmiðla.

 Hadjicostis var skotinn til bana þegar hann var að fara út úr bíl sínum. Árásarmennirnir voru tveir og var hann skotinn í tvígang í návígi, í brjóstið og bakið.

Dias fjölmiðlaveldið er í eigu föður Antis, Costis Hadjicostis.