Þær Elizabeth Chase og Kate Baldridge vilja fá að giftast. Hér sjást þær fyrir framan alríkisdómstólinn í San Francisco. Reuters

Í fyrsta sinn er tekist á um það fyrir alríkisdómstól í San Francisco í Kaliforníu hvort einstök ríki Bandaríkjanna geti bannað hjónavígslur samkynhneigðra.

Búist er við því að málinu verði áfrýjað til æðra dómsstigs, jafnvel til hæstaréttar Bandaríkjanna, sama hver niðurstaða alríkisdómstólsins verður.

Fari málið til hæstaréttar þá mun hann dæma um framtíð hjónavígslna samkynhneigðra á landsvísu. Dómi hæstaréttar verður ekki hægt að áfrýja, að því er fram kemur á fréttavef breska ríkisútvarpsins.

Tvö samkynhneigð pör höfðuðu málið, en þau vilja snúa við svokallaðri Proposition 8 (tillögu 8), sem eru lög sem banna samkynhneigðum að ganga í hjónaband í Kaliforníu. Skv. lögunum mega aðeins gagnkynhneigð pör giftast. 

Þeir sem styðja málaferlin bera þau saman við tímamótamál sem bundu enda á kynþáttaaðskilnað í bandarískum skólum og sneru við banni gegn hjónabandi fólks af ólíkum kynþætti.

Þeir vísa til stjórnarskrárinnar þar sem fjallað sé um rétt fólk til þess að ganga í hjónaband. Það að leyfa aðeins gagnkynhneigðum pörum að giftast mismuni samkynhneigðum.

Stuðningsmenn tillögu 8 segja að dómsmálið sé enn ein tilraunin til að snúa við, það sem þeir kalla, vilja fólksins. En 52% íbúa Kaliforníu studdu tillöguna í atkvæðagreiðslu sem fór fram árið 2008.

Það er nú í höndum dómarans Vaughn Walker að ákveða hvort bann gegn hjónavígslum samkynhneigðra í Kaliforníu stangist á við bandarísku stjórnarskrána.

Skilaboð Mark Wassberg, sem er stuðningsmaður Proposition 8, eru skýr. Reuters