Breskur karlmaður er ákærður fyrir að hafa myrt konu sína en þau störfuðu bæði við vændi. Réttarhöld hófust yfir manninum í héraðsdómi í Swansea í Bretlandi í dag, samkvæmt frétt Independent. Hann neitar hins vegar að hafa myrt konu sína.

Paul Grabham, 25 ára kvæntist Kirsty, 24 ára, innan þriggja mánaða eftir að þau kynntust haustið 2007. Segir í frétt Independent að það hafi komið fram við réttarhöldin í dag að hann hefði fljótlega flutt inn í íbúð hennar í  Swansea. Samband þeirra var, að sögn saksóknara, ofbeldisfullt allt frá upphafi og að vitni hafi séð hann beita Kirsty ofbeldi. En hún á einnig að hafa veitt honum ítrekað áverka.

Lík hennar fannst í ferðatösku undir brú í  Bridgend þann 6. apríl á síðasta ári. Grabham hafði tilkynnt hvarf hennar viku fyrr en síðast sást til hennar úti á lífinu í Swansea.

Saksóknari sagði að Grabham hafi kynnst konu sinni á nuddstofu í Bridgend þar sem Grabham var viðskiptavinur en hún starfaði sem vændiskona. Hann flutti fljótlega inn til hennar en hún hafði áður búið þar með fyrrverandi eiginmanni.

Að sögn saksóknara seldi Grapham sig einnig og skipti þar engu hvort um konur eða karla var að ræða. Hjónin ráku eigið vefsæði þar sem þau buðu konum og körlum upp á þjónustu sína, annað hvort saman eða í sitthvoru lagi. Að sögn nágranna rifust þau oft heiftarlega og vitni horfuðu á hann ganga í skrokk á henni í veislu sem þau voru gestir í. Voru þau þá bæði undir áhrifum vímuefna.

Gert er ráð fyrir að réttarhöldin muni standa yfir í fjórar vikur.