Forsætisráðherra Haíti segir, að hugsanlega hafi vel yfir 100 þúsund manns látið lífið af völdum jarðskjálfstans, sem  reið yfir Port-au-Prince, höfuðborg landsins, í gærkvöldi. Þetta megi ráða af þeirri eyðileggingu, sem blasi við í borginni.

„Það er erfitt að meta hve margir hafa látist, hve margar byggingar hafa hrunið. En ef fólk hefur verið inni í húsunum þá má búast við að yfir 100 þúsund hafi látið lífið," sagði Jean-Max Bellerive, forsætisráðherra Haíti við sjónvarpsstöðina CNN.  

„Ég vona að það sé ekki raunin því ég vona að fólk hafi komist út í tíma. En það eru svo margir á götunum nú að það er erfitt að mynda sér skoðun um það. En það eru svo margar byggingar hrundar, mörg borgarhverfi í rúst og í sumum þeirra sést ekki fólk," sagði hann.

Björgunarsveitir eru á leið til Haíti, þar á meðal alþjóðlega björgunarsveitin íslenska, sem er nú á leið frá Boston þar sem flugvél hennar millilenti fyrr í dag. Reiknað er með að sveitin lendi þar um klukkan 21 að íslenskum tíma. 

Slysavarnarfélagið Landsbjörg segir ljóst, að íslenska sveitin verði meðal þeirra fyrstu á svæðið og enn sem komið er hafi engar alþjóðabjörgunarsveitir komist á staðinn. Sú bandaríska mun væntanlega lenda í Haiti á svipuðum tíma. Því muni íslenska sveitin að öllum líkindum fara í að undirbúa komu annarra sveita, koma upp fjarskiptum og samhæfingarstöð aðgerða. Einnig þurfi að meta ástandið, hvar mesta þörfin er á aðstoð og finna mögulega staðsetningu búða.