Þúsundir íbúa Port-au-Prince, höfuðborgar Haíti, höfðust við undir berum himni í nótt, aðra nóttina í röð, eftir jarðskjálftann, sem reið þar yfir á þriðjudagskvöld. Fyrstu alþjóðlegu hjálparsveitirnar komu til landsins í gærkvöldi og var íslenska rústabjörgunarsveitin sú fyrsta sem þangað kom.

Borgarbúar hafa búið um sig á íþróttavöllum, götum og gangstéttum innan um lík þeirra sem fórust í jarðskjálftanum. Skólar, sjúkrahús, hótel, stjórnarbyggingar og forsetahöll landsins eru í rústum eftir skjálftann og fólk, útatað í blóði og ryki, kallar á hjálp á meðan það rótar með berum höndum í rústum húsa í leit að ástvinum. Angurvær söngur og bænir heyrast í gegnum myrkrið.  

Fréttamaður AFP segir að hópur fólks hafi reynt að grafa sér leið gegnum múrsteina þar sem áður stóð barnasjúkrahús. Einn úr hópnum, Jeanwell Antoine, hélt í hönd á barni, sem var fast í rústunum og reyndi um leið að losa það.

„Það er ekki ég, sem er að grafa. Það er hönd Guðs, sem elskar lífið og leiðbeinir mér svo ég geti bjargað þessu barni," sagði hann.

Sameinuðu þjóðirnar skipuleggja leitarstarf og störf alþjóðlegra björgunarsveita á Haíti en markmiðið er að læra af reynslunni frá löndunum við Indlandshaf þar sem flóðbylgjan gekk yfir árið 2004 en þá var alþjóðlegt björgunarstarf illa samhæft og tilviljanakennt.   

„Aðaláherslan er nú lögð á að finna fólk á lífi," sagði Elisabeth Byrs, talsmaður skrifstofu mannúðarmála SÞ. „Það má engan tíma missa."

Óttast er að allt að hálf milljón manna kunni að hafa látið lífið í skjálftanum en um 4 milljónir manna búa í Port-au-Prince og nærliggjandi bæjum. Höfuðstöðvar Sameinuðu þjóðanna á Haíti hrundu og tugir starfsmanna SÞ eru látnir. Friðargæsluliðar erlendra ríkja létu einnig lífið í skjálftanum, þar af að minnsta kosti 8 Kínverjar og þrír Jórdanar.

Forsetahöllin hrundi. René Préval, forseti, var ekki staddur þar þegar skjálftinn reið yfir en hann sagðist í viðtölum hafa orðið að stíga yfir lík þegar hann kom í húsið á eftir og hann heyrði örvæntingarhróp þeirra, sem voru grafnir undir rústunum.