Nokkurra norræna ríkisborgara er saknað á Haíti eftir jarðskjálftann, sem reið yfir höfuðborgina Port-au-Prince á þriðjudagskvöld. Enginn Norðurlandabúi kom með flugvél Icelandair til baka frá Haíti eftir að hún hafði flutt íslensku rústabjörgunarsveitina þangað í gærkvöldi.

Norðmanns á sjötugsaldri, sem var í kynnisferð á Haíti er saknað, að sögn norska utanríkisráðuneytisins. Þá er ekki vitað um afdrif nokkurra Svía sem voru á Haíti og sænska utanríkisráðuneytið kannar nú hve margir Svíar kunni að hafa verið staddir í landinu. 

Þá er tveggja Dana saknað en alls voru 11 Danir á Haíti þegar skjálftinn reið yfir. Einn Íslendingur, Halldór Elías Guðmundsson, var á Haíti en hann er heill á húfi. Halldór var í för með bandarískum skólafélögum sínum en hann stundar nám í Ohio. Hann var á hóteli í bænum Jacmel á suðurströnd Haítí.

Íslenska utanríkisráðuneytið bauð í gærkvöldi aðstoð við að flytja erlenda ríkisborgara frá Haítí með flugvélinni sem flutti íslensku björgunarsveitina til Haíti. Um 80 manns nýttu sér þetta boð, flestir Bandaríkjamenn, sem voru um 50 talsins. Þá voru 10 Kanadamenn, 10 Þjóðverjar, Breti og Frakki í vélinni þegar hún fór heim.