ENRIQUE DE LA OSA

Tuttugu og sex sjúklingar á geðsjúkrahúsi í Havana á Kúbu létu lífið í síðustu viku vegna mikilla kulda sem herjað hafa á landið. Yfirvöld á eyjunni hafa fyrirskipað rannsókn á málinu, en óttast er að sjúklingarnir hafi verið vanræktir.

„Við höfum séð mikla aukningu í dauðsföllum sjúklinga á síðustu vikum, sem tengja má löngu kuldakasti að undanförnu,“ segir í yfirlýsingu frá stjórnvöldum Kúbu.

Nefnd á vegum kúbverska heilbrigðisráðuneytis sem skoðað hefur dauðsföllin telur ýmislegt benda til að ekki hafi verið brugðist rétt við aðstæðum og það leitt til ýmis konar skorts,“ segir í yfirlýsingu stjórnvalda. Þar kemur einnig fram að þeir sem báru ábyrgð á málum verði dregnir fyrir dóm.

Starfsmenn spítalans sem ekki vilja nafn síns getið segja að rekja megi dauðsföll sjúklinganna til þess að þá hafi skort mat og teppi vegna þess að öllu slíku hafi verið stolið af þeim.

Elizardo Sanchez, leiðtogi Mannréttindasamtakanna á Kúbu sem eru bönnuð samtök þar í landi, greindi fyrst frá dauðsföllunum og hélt því fram að þau stöfuðu af „glæpsamlegri vanrækslu.“ Tók hann fram að aldrei áður í sögu Kúbu hefðu svo margir dáið að ástæðulausu á kúbversku sjúkrahúsi. Sagði hann samtökin hafa sívaxandi áhyggjur af stöðu heilbrigðismála í landinu.