Mehmet Ali Agca, sem reyndi að ráða Jóhannes Pál páfa II af dögum á Péturstorginu árið 1981 var í dag leystur úr haldi í Tyrklandi. Ali Agca afplánaði 19 ára dóm fyrir tilræðið við páfa og 10 ára dóm til viðbótar fyrir að myrða tyrkneskan blaðamann árið 1979. 

Lengi hafa verið efasemdir um að  Ali Agca væri heill á geðsmunum. Hann sendi frá sér yfirlýsingu í morgun þar sem hann lýsti því yfir, að heimsendir væri í nánd og að sjálfur væri hann Kristur endurborinn. 

Ali Agca, sem er 52 ára að aldri, var félagi í tyrkneskum öfgasamtökum og flúði land eftir að hann myrti þarlendan ritstjóra. Hann skaut á páfa á Péturstorginu í Róm í maí 1981 og særði hann alvarlega. Páfi heimsótti Ali Agca fangaklefann þremur árum síðar og fyrirgaf honum.

Ali Agca sagðist fyrst hafa verið einn að verki en á næstu árum sendi hann frá sér ýmsar mótsagnakenndar yfirlýsingar.  Eitt sinn sagðist hann hafa verið að hlýða fyrirskipunum búlgörsku leyniþjónustunnar.  

Ali Agca  var í morgun fluttur á sjúkrahús þar sem hann gengst undir læknisskoðun og hann þarf síðan væntanlega að gegna herþjónustu.