Reuters

Spænsk stjórnvöld hafa ákveðið að greiða fyrir því að börn frá Haítí, sem þegar var búið að veita spænskum borgurum leyfi fyrir að ættleiða, geti ferðast til Spánar eins fljótt og auðið er. Þetta var haft eftir utanríkisráðherra landsins í dag.

Samkvæmt upplýsingum úr utanríkisráðuneytinu er þar verið „að taka ákveðin skref þannig að börn frá Haítí sem þegar sé búið að veita spænskum fjölskyldum leyfi til að ættleiða geti ferðast til Spánar í ljósi hinna sérstöku aðstæðna sem nú ríkja á Haítí.“

Starfsmenn ráðuneytisins hafa fundað með þeim fjölskyldum sem lokið höfðu ættleiðingarferlinu í því skyni að veita þeim alla þá aðstoð sem möguleg er til þess að flýta því að hægt verði að ná í börnin og koma þeim til Spánar. Vinna þeir líka náið með ættleiðingarstofnunum.

Reynsla síðustu ára hefur verið sú að þegar öllum nauðsynlegum skrefum í ættleiðingarferlinu er lokið og leyfi fyrir ættleiðingunni hefur verið veitt getur engu að síður liðið margir mánuðir þar til endanlegt vilyrði fæst fyrir því að fara með börnin frá Haítí til nýrra heimkynna þeirra á Spáni.

Margar fjölskyldur víðs vegar um heiminn sem voru í miðju ættleiðingarferli reyna nú í örvæntingu að fá svör um það hvort væntanleg börn þeirra hafi lifað jarðskjálftana af og hvernig þeim reiði af í framhaldinu.

Sumir óttast að ættleiðingarumsóknir þeirra séu týndar og tröllum gefnar í kjölfar náttúruhamfaranna, sem geti valdið ómældum töfum á ættleiðingarferlinu.

Fyrr í dag fór flugvél frá Hollandi til Haítí með starfsmönnum tveggja ættleiðingarstofnana í þeim tilgangi að finna um 100 börn í Haítí á aldrinum fimm mánaða til sjö ára sem hollenskar fjölskyldur höfðu þegar fengið leyfi til að ættleiða.