Bill Clinton, fyrrverandi forseti Bandaríkjanna, er nú staddur á Haítí þar sem hann hefur hitt fórnarlömb jarðskjálftans. Clinton heitir því að gera allt sem í sínu valdi stendur til að hjálpa íbúum Haítí.

Hann hefur heimsótt sjúkrahús í Port-au-Prince ásamt dóttur sinni Chelsea, en þau komu til landsins í gær. Clinton ræddi við lækna og sjúklinga, m.a. ungan pilt sem hlaut höfuðkúpubrot í hamförunum. Læknar sögðu að það yrði nauðsynlegt að flytja piltinn úr landi svo hann gæti fengið bestu mögulegu aðstoð.

Clinton aðstoðaði jafnframt við björgunarstörf, en hann tók þótt í því að afferma flugvél sem flutti vatn til landsins.

Barack Obama, forseti Bandaríkjanna, óskaði eftir aðstoð Clintons, sem er einnig sérstakur sendifulltrúi Bandaríkjanna á Haítí. George W. Bush, fyrrum Bandaríkjaforseti, tekur einnig þátt að safna fé til handa íbúum landsins. 

Yfirvöld á Haítí telja mögulegt að tala látinna muni ná yfir 200.000.