Lauritz.com neitar að bjóða mynd eftir Kurt Westergaard upp. SCANPIX DENMARK

Teikning Kurts Westergaard af Múhameð spámanni er enn og aftur komin í fréttirnar í Danmörku, eftir að stærsti uppboðsvefur Norður-Evrópu, Laurtiz.com, ákvað að bjóða ekki upp mynd eftir Westergaard af ótta við að það kynni að stefna öryggi starfsmanna uppboðshaldarans í hættu.

Tengist ekkert íslamstrú

Til stóð að bjóða vatnslitamynd eftir Westergaard upp á uppákomu til styrktar nauðstöddum á Haítí. Þrátt fyrir að myndin hafi enga vísun í íslamstrú treysti uppboðshaldarinn sér ekki til að bjóða hana upp, í ljósi árásar sem gerð var á Westergaard á nýársdag og þeirrar stöðugu hættu sem hann býr við.

Í samtali við ekstrabladet.dk segir Westergaard að sér þyki leiðinlegt að verið sé að brennimerkja sig með þessum hætti. Menningamálaráðherrann Carina Christensen hefur hvatt uppboðshaldarann til að endurskoða afstöðu sína, enda sé um óþarflega harkaleg viðbrögð að ræða.

Lifir í stöðugri hættu

Westergaard komst í heimsfréttirnar er Jyllands-Posten birti Múhameðs teikningarnar frægu haustið 2005, en mynd Westergaards af Múhameð með sprengju um hálsinn vakti sérstaka athygli og mikla reiði strangtrúaðra múslima.

Frá því árið 2008 þegar þrír múslimar voru handteknir fyrir að leggja á ráðin um að myrða Westergard, hefur hann notið stöðugrar verndar lögregluyfirvalda í Danmörku. Þann fyrsta janúar sl. réðst sómalískur maður inn í hús Westergaards vopnaður exi, en komst sá síðarnefndi naumlega undan með því að flýja inn í sérútbúið öryggisherbergi í húsi sínu.

Múhameðs teikningarnar vöktu mikla athygli, og reiði strangtrúaðra múslima. SCANPIX DENMARK