Sjúkraflutnings- og lögreglumenn flytja lík úr fangelsinu í sjúkrabíl. Reuters

Að minnsta kosti 23  fangar létu lífið í illræmdu fangelsi í Durango-héraði í Mexíkó þegar tveimur óvina glæpagengjum lenti saman.

Hermenn voru kallaðir út til þess að aðstoða lögregluna við að stilla til friðar. Ólætin brutust út skömmu eftir morgunmat í fangelsinu. Alls sitja 1.800 fangar inni í fangelsinu, sem er langt umfram það sem fangelsið ræður við.

Það tók 40 mínútur fyrir öryggisverði að bæla niður óeirðirnar. Fréttir herma að deilan hafi staðið milli meðlima í gengjunum Gulf annars vegar og Sinaloa hins vegar sem berjast um yfirráð yfir eiturlyfja- og vopnamarkaðinn.

„Við getum staðfest að 23 einstaklingar létu lífið í átökunum,“ er haft eftir talsmanni embætti saksóknara.

Hann neitaði að gefa upp hvað valdið hefði deilunum, en vitað er að meðlimir Gulf og Sinaloa hafa síðustu mánuði barist hatramlega um yfirráðin á smygleiðum til Bandaríkjanna.

Skemmst er að minnast þess þegar svipuð átök brutust út í fangelsinu í ágúst sl. með þeim afleiðingum að 20 fangar létu lífið og 25 særðust. Á þeim tíma lýsti Jorge Torres, yfirmaður öryggismála í Durango, fangelsinu sem „tifandi tímasprengju“ sem biði þess eins að springa.

Durango ásamt nágrannahéröðunum Sinaloa og Chihuahua mynda svokallaðan gylltan þríhyrning, en með því viðurnefni er vísað til þess að stórfelld ræktun á maríjúana, ópíumi og heróíni fer fram í héröðunum þremur.

Fjöldi manns beið fyrir utan fangelsið og vildi fá fréttir af ættingjum sínum og vinum. Reuters