Loka þurfti hluta af flugvellinum í München í suðurhluta Þýskalands í þrjár klukkustundir eftir að eftir að fartölva farþega virkjaði sprengjuleitarbúnað flugvallarins. Frá þessu er greint á vef breska ríkisútvarpsins.  

Eigandi tölvunnar flýtti sér út úr öryggiseftirlitinu með tölvuna sína og í framhaldinu var hluti flugstöðvarinnar lokað meðan lögreglan leitaði mannsins.

Talsmaður lögreglunnar segir að maðurinn hafi hugsanlega ekki gert sér grein fyrir því að hann þyrfti að undirgangast frekari öryggisskoðun.

Seinka þurfi tólf flugum vegna atviksins.

Í upphaflegum fréttum kom fram að um raunverulega sprengju hefði verið að ræða sem fundist hefði á flugvellinum, en lögreglan á staðnum bar það síðar til baka. Undirstrikaði talsmaður lögreglunnar að þó sprengjuleitarbúnaðurinn hafi gefið frá sér viðvörunarmerki væri ekki þar með sagt að sprengjuefni hafði verið í tölvunni.

Öryggisverðir hafi einvörðungu viljað fá að skoða tölvuna nánar, en þá hafi maðurinn stungið af. „Við teljum að maðurinn hafi ekki gert sér grein fyrir að skoða þyrfti tölvunar nánar,“ segir Albert Poerschke, talsmaður lögreglunnar.

Heimildarmaður hjá lögreglunni sagði í samtali við AFP að mögulegt væri að sprengjuleitarbúnaðurinn hafi farið af stað vegna efna í loftinu, s.s. ilmvatns, og að maðurinn hefði hugsanlega aðeins verið að flýta sér vegna þess að hann væri orðinn of seinn út í flugvél sína.

München flugvöllurinn er annar annasamasti flugvöllur í Þýskalandi. Öryggisgæsla hefur verið hert víðs vegar um heim eftir að farþegi reyndi að sprengja upp flugvél á leið frá Amsterdam í Hollandi til Detroit í Bandaríkjunum á jóladag.