Íbúar í Port-au-Prince bíða eftir rútu, sem mun flytja þá út úr höfðuborginni. Reuters

Björgunarsveitir á Haítí eru farnar að draga úr leit að fólki á lífi í rústum húsa sem jöfnuðust við jörðu í jarðskjálftanum sem reið yfir landið í síðustu viku. Að sögn Sameinuðu þjóðanna er nú allt kapp lagt á að koma íbúum sem eiga um sárt að binda til aðstoðar.

Elizabeth Byrs, talskona SÞ, segir að sumar björgunarsveitir séu að fara eða séu farnar frá landinu. En vonir um að finna fleira fólk á lífi í rústunum dvína með hverjum degi sem líður.

Frést hefur að lífið sé smátt og smátt að komast í eðlilegt horf. Sumar litlar verslanir hafa t.d. opnað á nýjan leik og einkareknir strætisvagnar aka um götur landsins. Þá er búið að opna aftur höfnina, sem skemmdist mikið í skjálftanum. Þangað streyma nú skip með hjálpargögn.

Fólk heldur hins vegar enn að streyma frá Port-au-Prince, höfuðborg Haítí, sem varð fyrir miklu tjóni í hamförunum.

Ísrealskir hermenn og sjálfboðaliðar frá Haítí eru á meðal þeirra sem hafa aðstoðað við björgunarstörf. Reuters