Orðaval Osama bin Ladens, leiðtoga al-Qaeda hryðjuverkasamtakanna, í nýrri hljóðupptöku þykir benda til að hryðjuverkasamtökin séu að undirbúa nýja árás. Þetta segir bandaríska eftirlitsstofnunin IntelCenter, sem vaktar vefsíður íslamista.

„Hljóðupptaka Osama bin Laden sem Al-Jazeera fékk 24. janúar 2010 inniheldur sérstakt tungumál, sem bin Laden notar í yfirlýsingum sínum fyrir árásir,“ segir í yfirlýsingu frá IntelCenter.

Fram kemur að orðaval hryðjuverkaleiðtogans sé mögulega vísbending um það að árás sé væntanleg innan 12 mánaða.

„Orðalagið „Friður sé með þeim sem fylgja leiðsögn“ kemur í upphafi og í lok skilaboða sem eru send fyrir árásir, en þeim er ætlað að vara óvini al-Qaeda við því að þeir verði að breyta um hegðun annars verði ráðist á þá,“ segir stofnunin.

Í hljóðupptökunni hrósar bin Laden Nígeríumanninum sem gerði tilraun til að granda farþegaþotu yfir Detroit á jóladag. „Með Guðs hjálp, þá munum við halda áfram að ráðast á ykkur svo lengi sem þið haldið áfram að styðja Ísrael,“ segir bin Laden jafnframt.