Medvedev Rússlandsforseti er bjartsýnn á að Bandaríkin og Rússland komist að lokasamkomulagi um afvopnunarmál. Reuters

Rússar og Bandaríkjamenn eru við það að ná lokasamkomulagi um kjarnorkuafvopnun. Þetta sagði Dímítrí Medvedev, forseti Rússlands, í dag. Stefnt er að því að leggja lokahönd á samkomulagið í febrúar.

„Samningaviðræðurnar hafa gengið vel. Við erum sammála um 95% þeirra atriða sem eru í nýja samkomulaginu,“ sagði forsetinn, að því er fram kemur í rússneskum fjölmiðlum. Hann kveðst bjartsýnn á að lokaniðurstaða náist.

Viðræður um nýjan START-afvopnunarsamning fóru fram á fimmtudag í Moskvu, að sögn heimildarmanns AFP-hjá rússneska hernum.

Sergei Lavrov, utanríkisráðherra Rússlands, segir að START-samningaviðræður muni hefjast af fullum krafti í upphafi næsta mánaðar.

Bandaríkjamönnum og Rússum hefur ekki tekist að semja um nýjan afvopnunarsamning, sem á að taka við af START-I samkomulaginu sem rann út 5. desember sl. Samningurinn undirritað árið 1991, rétt áður en Sovétríkin liðuðust í sundur.

Barack Obama, forseti Bandaríkjanna, og Medvedev hafa sett sér það markmið að fækka kjarnaoddum ríkjanna, eða sem nemur 1.500-1.675 oddum hvor þjóð.