Haítísk börn á munaðarleysingjahælinu Maison Des Affaires de Dieu í Port-au-Prince þann 22. janúar. Til stendur að tugir barna af hælinu verði ættleidd til Bandaríkjanna á næstunni. TOMAS BRAVO

Framkvæmdastjórn Evrópusambandsins hvatti í dag Evrópuþjóðir til að stilla sig um að skipuleggja hraðvirkar ættleiðingar frá Haítí. Óttast er að kerfishrunið á Haítí og þrýstingur á að bjarga börnum þaðan með ættleiðingu leiði til þess að fjöldi barna á vergangi verði fórnarlömb mansals.

„Við stöndum frammi fyrir erfiðri stöðu," hefur AFP eftir talsmanni framkvæmdastjórnarinnar, Michele Cercone. Annars vegar líti margar Evrópuþjóðir svo á að hraðvirkar ættleiðingar séu góð leið til að hjálpa börnunum á Haítí.  Hinsvegar sé það „mjög flókið að skilja stöðu barnanna þar, jafnvel þeirra sem hafa misst foreldra sína, og ættleiðing væri sennilega ekki besta lausnin núna".

Nokkur lönd hafa nú þegar sett ættleiðingaferli af stað á fullum krafti, þ.á.m. Belgía, Frakkland, Þýskaland og Holland, Spánn og auk þess Bandaríkin. Framkvæmdastjórnin virðist í málinu vera á öndverðum meiði við Spán, sem fer sem stendur með forsætið.

Utanríkisráðherra Spánar, Miguel Angel Moratinos, leitaði í dag leiða til að samræma aðgerðir þeirra þjóða sem vilja ættleiða frá Haítí. Hún sagði á föstudag að markmiðið væri að „flýta fyrir ættleiðingaferlinu í þeim málum sem þegar eru komin af stað" og að „efla aðstoð og alþjóðlega vörn fyrir börn undir lögaldri eða munaðarleysingja sem eru ein á ferð".

Allt síðan jarðskjálftinn varð á Haítí hefur farið vaxandi þrýstingurinn frá pörum í öðrum löndum sem vilja ættleiða börn um að flýta fyrir ferlinu svo þau geti bjargað munaðarleysingjum úr hinum hræðilegu aðstæðum sem eru víða á Haítí.

Barnaverndunarhópar óttast hinsvegar að kerfishrunið á Haítí geti leitt til þess að fjöldi barna sem þar eru á vergangi verði fórnarlömb mansals. Að sama skapi er hætta á því að börn sem verði ættleidd með hraði missi öll tengsl við uppruna sinn og ættingja sem enn eru á lífi.  Sameinuðu þjóðirnar lögðu um helgina ítrekaða áherslu á að pör sem vilji ættleiða flytji undir engum kringumstæðum börn frá Haítí fyrr en öll skjöl hafi verið útfyllt og frágengin bæði af forsætisráðherra landsins og af Sameinuðu þjóðunum.