Hermenn ríkisins við gæslu á götum Mogadishu í september í fyrra. STR

Hörð átök blossuðu upp á milli íslamskra skæruliða og hermanna úr sómalískri friðargæslu Afríkusambandsins  (AMISOM)  snemma aðfaranótt föstudags í miðborg Mogadishu. Skothríð hófst um klukkan 2 eftir miðnætti að staðartíma og hefur haldið áfram í alla nótt auk þess sem sprengjum hefur verið varpað.

Þegar leið á nóttina róaðist ástandið ögn en í birtingu hófust átökin aftur af fullum krafti.  Hermenn AMISOM verða reglulega fyrir árásum íslömsku skæruliðahópanna Shebab og Hezb al- Islam  sem hafa yfirráð yfir stórum hluta Mogadishu, en átökin verða sjaldan jafnhörð og í nótt. AFP hefur eftir vitnum að a.m.k. 7 almennir borgarar hafi fallið, þ.á.m. konur og börn. Á þriðja tug hafi særst. 

Í dag er liðið ár síðan forseti Sómalíu, Sharif Sheikh Ahmed, tók við embættinu með stuðningi alþjóðasamfélagsins. Skæruliðarnir hafa síðan gert tilraun til að steypa Ahmed af stóli og halda þeir því jafnframt fram að hermenn AMISOM hafi hernumið landið og séu í krossferð gegn múslimum í Sómalíu.

Síðasta mánudag var banvæn árás gerð á hóp sómalískra borgara sem stóðu í röð við eina af stöðvum friðargæsluliða Afríkusambandsins til að fá læknishjálp. Einn hermaður og fimm almennir borgarar féllu í árásinni.