Framtíðarhorfur þeirra Haiti-búa sem misstu útlimi í kjölfar jarðskjálftans í síðasta mánuði eru mjög óljósar. Fjöldi fólks fórst í jarðskjálftanum og hann breytti einnig lífi óteljandi annarra sem lifðu hann af. 

Maga er 22 ára gömul kona sem missti báða fæturna. Þeir krömdust undir vegg sem féll á hana. Hún er þakklát fyrir þá aðhlynningu sem hún hefur hlotið. 

„Læknarnir gefa mér verkjastillandi lyf ef ég þarf á þeim að halda. Ég fæ inndælingu í æð síðdegis hvern dag.“ Læknar á Haiti segja að tugir þúsunda fólks kunni að missa útlimi vegna jarðskjálftans 12. janúar síðastliðinn. Það geti gerst vegna meiðsla eða vegna þess að drep kemst í útlimina.

Hin nýja kynslóð þeirra sem misst hafa útlim eða útlimi - sem margir eru ungir að árum - mun þarfnast dýrrar meðferðar. Meðferðar sem fæstir Haiti-búar gátu búist við að fá áður en jarðskjálftinn skók þetta fátækasta ríki á vesturhveli jarðar. 

Sjúkrahúsin í Port-au-Prince anna ekki álaginu, þrátt fyrir utan að komandi hjálp. Oda Mukkuaka læknir kveðst hafa áhyggjur af því að það dragi úr þjónustunni þegar hjálparstarfsmenn hverfa á braut.

„Við eigum ekki sjúkrahús. Hvíta fólkið mun fara og bara Haitibúar verða eftir. Þeir þurfa mikla hjálp, en það verður ekkert framhald. Ég vildi hafa framhald á þessu ef mögulegt er,“ sagði Oda Mukkuaka læknir.

Læknar segja að mörg börn sem hafa verið aflimuð þurfi nýja gervilimi á tveggja til þriggja ára fresti meðan þau eru að vaxa. Kostnaðurinn af því muni sliga heilbrigðiskerfi landsins næstu áratugina. 

Hér er frétt mbl.is um stuðning Össurar við Haiti-búa.