Í nýju fjárlagafrumvarpi sem stjórn Baracks Obama Bandaríkjaforseta hefur lagt fram er gert ráð fyrir því að hagvöxturinn verði 2,7% í ár og 3,8% á næsta ári. Stjórnin hyggst meðal annars verja um 100 milljörðum dala á næsta ári í aðgerðir til að stuðla að fjölgun starfa og auka útgjöldin til menntamála, samkvæmt frumvarpi til fjárlaga næsta árs. Skattaafslættir fjölskyldna með meira en 250.000 dali (32 milljónir króna) í árstekjur eiga að falla úr gildi samkvæmt frumvarpinu.

Heildarútgjöld til margra verkefna í innanríkismálum verða einnig fryst, en frystingin nær þó ekki til öryggismála eða almannatrygginga.

Að sögn Bandaríkjastjórnar er gert ráð fyrir því að heildarútgjöldin aukist um 3% á fjárhagsárinu, sem hefst 1. október, miðað við núgildandi fjárlög. Gert er ráð fyrir því að fjárlagahallinn verði 10,6% af vergri landsframleiðslu í ár en 8,3% á næsta ári. Fjárlagaskrifstofa forsetaembættisins spáir því að hallinn verði kominn niður fyrir 4% af landsframleiðslunni fyrir árið 2015.

Stjórnin hyggst m.a. lækka skatta á smáfyrirtæki og hvetja þau þannig til að ráða nýja starfsmenn eða hækka laun. Hún hyggst einnig stuðla að fjölgun starfa með auknum opinberum framkvæmdum og fjárfestingum í hreinni orku, að sögn The Washington Post. Gert er ráð fyrir því að aðgerðirnar til avinnusköpunar kosti alls um 100 milljarða dala.

Stjórnin óskar einnig eftir aukafjárveitingu að andvirði 33 milljarða dala í ár vegna þeirrar ákvörðunar Obama að senda 30.000 hermenn til viðbótar til Afganistans.

Í fjárlagafrumvarpinu er gert ráð fyrir því að hagvöxturinn verði 2,7% í ár og 3,8% á næsta ári eftir 2,5% samdrátt á síðasta ári. Búist er við að atvinnuleysið minnki úr 10% í ár í 9,2% á næsta ári og síðan 8,2% á þarnæsta ári.