Dómari í Hong Kong komst í gær að þeirri niðurstöðu að feng-shui-meistarinn Tony Chan ætti ekki tilkall til að erfa auð Ninu Wang, sem eitt sinn var auðugasta kona Asíu. Mun dánarbú hennar, sem metið er á fjóra til 13 milljarða dollara, því renna til góðgerðarstofnunar í samræmi við erfðaskrá frá 2002.

Wang og maður hennar, Teddy Want, urðu vellauðug af fasteignaviðskiptum. 1983 var hjónunum rænt. Hún var látin laus til að ganga frá lausnargjaldi og að lokum var manni hennar sleppt. Teddy Wang var rænt aftur 1990 og helmingur 60 milljóna dollara lausnargjalds var greiddur, en hann sást aldrei aftur.

Tony Chan kom til sögunnar eftir að Teddy Wang hvarf. Hann hitti Ninu Wang 1992 og nuddaði á henni höfuðið. Hún fékk hann til að hjálpa sér við leitina að manni sínum og síðar til að lækna sig af krabbameini. Lét Chan grafa víða um Hong Kong, á allt að 80 stöðum í anda feng shui og skilja eftir eðalsteina í holunum.

Chan sagði að í áranna rás hefði Wang látið sig hafa 258 milljónir dollara fyrir ýmis verk. Í 15 ár voru þau saman, þótt hann væri kvæntur annarri konu. Wang lést af krabbameininu 2007, þá 69 ára. Dómarinn úrskurðaði að undirskrift á erfðaskrá, sem bar ártalið 2006 og kvað á um að Chan ætti að erfa allar hennar eigur, væri fölsuð. Því fengi hann ekki neitt og yrði að láta sér gjafir ástkonu sinnar fyrrverandi nægja.