Fóstureyðingum meðal kínverskra skólastúlkna hefur fjölgað á síðustu árum.

Níu ára skólastúlka varð ein af yngstu mæðrum heims á dögunum þegar hún ól barn, að sögn kínverskra fjölmiðla.

Barnið var tekið með keisaraskurði á miðvikudaginn var á sjúkrahúsi í Changchun í Jilin-héraði í norðausturhluta Kína. Kínverskir fjölmiðlar segja að stúlkunni og nýfædda barninu heilsist vel en foreldrar hennar hafi kært málið til lögreglunnar. Samkvæmt kínverskum lögum eru kynmök með barni undir 14 ára aldri skilgreind sem nauðgun.

Kínversk yfirvöld hafa hafið herferð gegn því að börn og unglingar hefji kynlíf of snemma, meðal annars bannað umfjöllun um kynlíf á netinu. Unglingum er oft vikið úr skóla ef þeir eru grunaðir um að vera í kynferðislegu sambandi.

Þessi stefna hefur sætt gagnrýni og yfirvöldin hafa verið hvött til að bæta frekar kynlífsfræðsluna til að fækka fóstureyðingum meðal stúlkna á táningsaldri. Samkvæmt tölum frá sjúkrahúsum í Kína hefur fóstureyðingum meðal skólastúlkna fjölgað mjög á síðustu árum.

Yngsta móðir sem vitað er um í heiminum er Lina Medina, sem ól barn í Perú þegar hún var fimm ára gömul árið 1939.