Dmitry Medvedev, forseti Rússlands, og Barack Obama, forseti Bandaríkjanna, eru langt komnir með að semja um fækkun kjarnorkuvopna að sögn The Wall Street Journal. Reuters

Bandarískir embættismenn vildu ekki staðfesta í dag fréttir um að Bandaríkjamenn og Rússar hafi náð „samkomulagi í meginatriðum“ um að minnka kjarnorkuvopnabirgðir sínar verulega. 

Dagblaðið The Wall Street Journal greindi frá því í gær að fyrsti samningurinn um kjarnorkuafvopnun stórveldanna í tvo áratugi væri í augsýn. Embættismennirnir sögðu að ekki væri hægt að fullyrða hvenær samningaviðræðum lyki.

Mike Hammer, talsmaður bandaríska Þjóðaröryggisráðsins,  vitnaði einungis í nýleg ummæli Barack Obama Bandaríkjaforseta þegar hann var beðinn að tjá sig um fréttina frá því í gær. „Eins og forsetinn sagði í stefnuræðu sinni þá eru Bandaríkin og Rússland að ljúka samningaviðræðum um samkomulag,“ sagði Hammer.

Embættismaður í Kreml í Moskvu sagði að til greina kæmi að undirrita nýtt samkomulag í vor í Prag. Þar flutti Obama einmitt lykilræðu sína um kjarnorkuafvopnun. Hann sagði að Bandaríkjamenn horfðu til Prag í þessu sambandi og að Rússar væru því ekki mótfallnir. 

Aðstoðarmaður Dmitrí Medvedevs Rússlandsforseta sagði einnig að samkomulag kunni að verða undirritað síðar í vor. Hann nefndi mars eða apríl í því sambandi. „Það er búið að skrifa meginmálið og samþykkja þótt ágreiningur sé enn um nokkur smáatriði,“ sagði Sergei Prikhodko aðstoðarmaður forsetans í utanríkismálum.