Dalai Lama á blaðamannafundi í Reykjavík á síðasta ári. mbl.is/Kristinn

Dalai Lama, andlegur leiðtogi Tíbeta, fer í heimsókn í Hvíta húsið, bústað Bandaríkjaforseta í Washington, síðar í þessum mánuði, þrátt fyrir að Kínverjar séu mjög óánægðir með að forsetinn ætli að taka á móti Dalai Lama.

Ekki hefur verið gefið upp hvort fundurinn verði á skrifstofu forsetans, né heldur hvort hann muni koma fram opinberlega með Dalai Lama.

Heimsóknin þykir ekki hjálpa til í stormasömum samskiptum Bandaríkjanna og Kína, en í dag var því engu að síður lýst yfir hjá Hvíta húsinu að kínversk stjórnvöld myndu örugglega halda áfram að hjálpa til við að hafa stjórn á kjarnorkumálum Írans, þrátt fyrir mótstöðu þess ríkis við að lúta valdi alþjóðasamfélagsins í þeim efnum.

Barack Obama mun hafa tjáð forseta Kína, Hu Jintao, það þegar þeir hittust í Peking í nóvember, að hann myndi halda fund með Dalai Lama. Obama hafnaði því hins vegar að hitta Dalai Lama í fyrra, áður en hann fór til Kína, til þess að reyna að koma samskiptum sínum við Kínastjórn af stað á vinalegum nótum.

Í gær lýstu Kínverjar því yfir að þeir væru algerlega á móti heimsókn Dalai Lama til Washington.