Nelson Mandela SIPHIWE SIBEKO

Nelson Mandela, fyrrum forseti Suður-Afríku, fagnar því að 20 ár eru liðin síðan honum var sleppt úr fangelsi. Mandela boðaði til hátíðarkvöldverðar í kvöld og meðal boðsgesta eru fyrrverandi eiginkona hans Winnie og einn fyrrverandi fangavarða hans ásamt börnum og barnabörnum.

Mandela varð fyrsti svarti forseti Suður-Afríku. Hann sat í fangelsi í 27 ár, lengst á  Robben eyju en endurheimti frelsið þann 11. febrúar 1990. Hann er nú 91 árs gamall.

Hann er sagður hafa myndað vináttutengsl við fangavörðinn Christo Brand sem hreifst af viðhorfum hans til mannréttinda. Sjálfur segir Mandela að samskiptin við Brand hafi styrkt trú hans á manngæsku fólks, jafnvel þeirra sem héldu honum föngnum.

Stjórnmálamaðurinn Cyril Ramaphosa, sem var ötull í baráttunni gegn kynþáttaaðskilnaði S-Afríku, sagði í skálarræðu sinni að Mandela væri fólki enn fyrirmynd. „Við erum þér að eilífu skuldbundin fyrir þá forystu og þann innblástur sem þú veittir okkur. Við fögnum því að þú sért frjáls maður, því með því að hljóta sjálfur frelsi veittir þú okkur frelsi."

Dóttir Mandela, Zindzi Mandela, kvikmyndaði hátíðarkvöldverðinn í kvöld þar sem hún hefur í bígerð heimildarmynd sem hún kallar „Samtöl um þennan dag" og verður hún sýnd þann 11. febrúar.