Campbell varði Blair í viðtali
Alistair Campbell umkringdur fréttamönnum. Reuters
Alastair Campbell, sem var blaðafulltrúi Tony Blair, fyrrum forsætisráðherra Bretlands, um tíma, varð klökkur í viðtali við BBC í dag þegar hann varði þá ákvörðun fyrrum vinnuveitanda síns að taka þátt í innrásinni í Írak árið 2003.
Campbell vísaði því á bug í viðtalinu, að Blair hefði afvegaleitt breska þingið með fullyrðingum um að Saddam Hussein, þáverandi forseti Íraks, byggi yfir gereyðingarvopnum. Sakaði Campbell fjölmiðla um ófrægingarherferð og að reyna að jafna sakir frekar en að leiða sannleikann í ljós.
Rannsóknarnefnd á vegum breska þingsins er nú að störfum og á að rannsaka aðdraganda Íraksstríðsins. Bæði Campbell og Blair hafa borið vitni fyrir nefndinni en nefndarstarfið hefur endurvakið umræðu í Bretlandi um hvers vegna breska leyniþjónustan taldi að Írakar gætu beitt efnavopnum með litlum fyrirvara. Í ljós kom síðar að Írakar bjuggu ekki yfir slíkum vopnum þegar innrásin var gerð.
Campbell sagði í viðtalinu í dag, að forsætisráðherrann hefði ekki afvegaleitt þingið. Þegar Campbell var spurður nánar hvers vegna Blair hefði sagt, að enginn efi léki á að Írakar réðu yfir gereyðingarvopnum var greinilegt að hann klökknaði: „Ég hef þurft að ganga í gegnum ýmislegt vegna þessa," svaraði Campbell. Hann tók sig síðan taki og sagði: „Tony Blair er að mínu áliti algerlega heiðvirður maður. Og ég held einnig, að það sem við höfum þurft að þola vegna þessa... þessi stöðuga ófrægingarherferð... Ég held að eins og málið hefur þróast er ljóst að menn hafa ekki áhuga á að leiða sannleikann í ljós. Ég held að þið allir (í fjölmiðlunum) hafi meiri áhuga á að jafna sakirnar og koma ykkar skoðunum á framfæri."
Campbell bætti við, að hann bæðist afsökunar á því að láta tilfinningarnar í ljós með þessum hætti. „En ég vann við hliðina á Tony, ég veit að þetta var þungbær ákvörðun og ég veit að við undirbjuggum hana gaumgæfilega."
Hann viðurkenndi, að Íraksstríðið og afleiðingar þess væru þungbærar fyrir marga en 179 breskir hermenn hafa látið lífið og um það bil 100 þúsund óbreyttir íraskir borgarar að mati óháðra samtaka frá því innrásin var gerð í mars 2003.
„En ástæðan fyrir því að fólk er stöðugt að ræða um málið er að þeir sem eru ósammála þeirri ákvörðun sem Tony Blair tók vilja ekki að hin hlið málsins komi fram."
