Miðborg Osló. Konungshöllin í bakgrunni. Golli / Kjartan Þorbjörnsson

Norsk kona af pakistönskum ættum, 26 ára gömul, sem var rænt fyrir fimm sólarhringum trúði vinkonu sinni fyrir því að hún vildi flytja að heiman. Konan hringdi í lögreglu þar sem hún var innilokuð í farangursgeymslu bíls og sagði að sér hefði verið rænt. Ekkert hefur til hennar spurst síðan.

Konan mun hafa sagt vinkonu sinni að hún vildi flytja að heiman og taka upp nýtt nafn. Hún vissi þó ekki hvernig hún ætti að fara að því, að sögn Verdens Gang.  Þá greindi konan vinkonu sinni frá því að foreldrar hennar hafi reynt að sannfæra hana um að giftast pakistönskum manni, en það vildi konan ekki. 

Að sögn VG mun eldri systir konunnar neita því að fjölskyldan hafi beitt hana þrýstingi. Sagt er að konan sem er saknað hafi átt leynilegan unnusta í Noregi. Lögregla hefur yfirheyrt hann sem vitni. 

Konan var á leið til vinnu sinnar síðastliðinn miðvikudag en hún starfaði í verslun í miðborg Oslóar. Í samtali sínu við lögregluna mun konan hafa nafngreint 28 ára gamlan Norðmann af pakistönskum ættum sem hún grunaði um að standa að baki ráninu.

Sagt er að sá sem konan nafngreindi starfi sem leigubílstjóri og að hann hafi borið óendurgoldna ást til hinnar horfnu í brjósti sér.  Maðurinn mun hafa neitað því að eiga nokkra sök á ráninu. Hann var settur í gæsluvarðhald í fjórar vikur á föstudaginn var. 

Aftenposten greinir frá því að lögreglan hafi fundið minnismiða hjá þeim grunaða. Svo virðist sem þar hafi hann skráð hjá sér það sem hann þyrfti til mannránsins, svo sem handjárn, lambhúshettu og sterkt límband. 

Mögulegt vitni að mannráninu hefur gefið sig fram við lögregluna. Það kveðst hafa séð bíl með opna farangursgeymslu og mann sem dró konu á eftir sér. Bíllinn stóð utan við verslun nálægt stoppistöð strætisvagna þar sem konan ætlaði að taka vagn.