Ali Dizaei. Reuters

Dómstóll í Bretlandi dæmdi í gær yfirmann í Lundúnalögreglunni í 4 ára fangelsi fyrir brot í starfi. Var lögreglumaðurinn fundinn sekur um að ráðast á annan mann og reyna að koma á hann sök í deilu um smávægilega peningaupphæð.

Lögreglumaðurinn heitir Ali Dizaei, 47 ára, en hann var hæst setti lögreglumaðurinn af asískum uppruna í Scotland Yard. Hann var fundinn sekur um að misbeita valdi sínu og  hindra framgang réttvísinnar. Honum verður nú vikið úr starfi og sviptur hluta eða öllum eftirlaunum sínum. 

Lögreglumenn, sem rannsökuðu málið, lýstu Dizaei sem glæpamanni í einkennisbúningi. Fram kom við réttarhöldin, að málið snérist um deilu Dizaei og 24 ára gamals írasks kaupsýslumanns, Waad al-Baghdadi, sem hafði sett upp vefsíðu fyrir lögreglumanninn.  Baghdadi rakst á Dizaei á veitingahúsi í Lundúnum árið 2008 og bað hann um að greiða sér 600 punda skuld vegna vinnunnar.

Dizaei reiddist og í kjölfarið fóru mennirnir að deila. Leikurinn barst út í nálæga hliðargötu þar sem Dizaei handtók og handjárnaði Baghdadi. Dizaei kallaði síðan út fleiri lögreglumenn og fullyrti að Baghdadi hefði stungið sig með pípumunnstykki úr málmi, sem héll á lyklakippu.  

Læknir komst síðar að þeirri niðurstöðu, að Dizaei hefði sjálfur veitt sér áverka sem sáust á líkama hans þar sem áverkarnir pössuðu ekki við munnstykkið.