Michelle Obama tekur þátt í átaki sem miðar að því að vekja Bandaríkjamenn til umhugsunar um offitu barna. POOL

Michelle Obama forsetafrú í Bandaríkjunum tekur þátt í átaki sem verið er að hleypa af stokkunum í Bandaríkjunum og miðar að því að berjast gegn offitu barna.

Obama sagði að þessi áætlun væri „mjög metnaðarfull“. Markmiðið væri að útrýma þessu þjóðfélagsmeini. Hún sagði í sjónvarpsþættinum "Good Morning America's" að hún vildi stuðla að því að barna okkar biði önnur og betri framtíð sem byggðist á lengri lífslíkum.

Átakið ber yfirskriftina „Let's Move“. Eitt af því sem lögð er áhersla á er að fræða foreldra um innihald fæðunnar og um mikilvægi hreyfingar. Jafnframt á að bæta þá fæðu sem skólar bjóða upp á.

Obama sagði að eitt af hverjum þremur börnum í Bandaríkjunum þjáðist af offitu. Hún benti á að gríðarlegum fjármunum væri varið til að kljást við afleiðingar offitu. Hún sagði að mikið væri í húfi að Bandaríkjamönnum tækist að breyta um stefnu.