Breska lögreglan hefur handtekið mann sem grunaður er um að hafa drepið lögregluþjón fyrir 25 árum. DAN CHUNG

Lögreglan í Bretlandi hefur handtekið mann sem grunaður er um að hafa myrt lögregluþjón í óeirðum London fyrir 25 árum. Maðurinn var þá aðeins 15 ára gamall.

Keith Blakelock var barinn til dauða 6. október 1985 í óeirðum sem brutust út í kjölfar þess að kona lést eftir að lögregla réðist inn á heimili hennar. Þetta vor með alvarlegustu óeirðum sem breska lögreglan hefur þurft að fást við.

Lögreglurannsókn fór fram á atvikinu sem leiddi til þess að þrír menn voru handteknir og dæmdir fyrir morðið. Síðar kom í ljós að þeir tengdust dauða lögreglumannsins ekki neitt. Rannsókn á málinu hófst því að nýju.

Í gær lýsti lögreglan því yfir að hún hefði handtekið mann grunaðan um að tengjast morðinu. Lögreglan lýsti handtökunni sem „mikilvægri“. Maðurinn er fertugur og var úrskurðaður í varðhald fram í maí. Ef grunur lögreglu um að hann hafi drepið lögreglumanninn er réttur hefur hann verið aðeins 15 ára gamall þegar morðið var framið. Í tilkynningu lögreglu er skorað á þá sem vita eitthvað um málið að gefa sig fram.

Keith Blakelock var fertugur þriggja barna faðir þegar hann lést. Hann var að reyna að verja slökkviliðsmenn við störf sín þegar ráðist var á hann.