Stuðningsmenn Janúkóvítsj héldu fund utan við höfuðstöðvar yfirkjörstjórnarinnar í Kænugarði í dag. Reuters

Barack Obama, Bandaríkjaforseti, hringdi í Viktor Janúkóvíts, sem lýstur hefur verið sigurvegari í forsetakosningum í Úkraínu um helgina, og óskaði honum til hamingju með sigurinn. Sagði Obama, að kosningarnar væru skref í rétta átt í lýðræðisþróuninni í Úkraínu. 

Janúkóvítsj fékk 3,5 prósentum fleiri atkvæði en Julía Timosjenkó, forsætisráðherra landsins.  Timosjenkó neitar að viðurkenna ósigur og flokkur hennar segir að umfangsmikil brögð hafi verið í tafli, einkum í austurhluta landsins þar sem Janúkóvítsj nýtur mests stuðnings. Eftirlitsmenn Öryggis- og samvinnustofnunar Evrópu, sögðu hins vegar að kosningarnar hefðu farið hið besta fram.

„Obama forseti hringdi í Viktor Janúkóvítsj í dag til að óska honum til hamingju með kjörið og óska honum góðs gengis við að koma stefnumálum sínum í framkvæmd," segir í yfirlýsingu frá Hvíta húsinu.

„Þessi friðsamlega tjáning á vilja úkraínskra kjósenda er enn ein jákvæð vísbending um að lýðræðið í Úkraínu er að styrkjast. 

Í yfirlýsingunni segir, að Obama og Janúkóvítsj hafi verið sammála um nauðsyn samvinnum um að berjast gegn útbreiðslu kjarnorkuvopna og þá óskuðu þeir liðum hvor annars góðs gengis á vetrarólympíuleikunum sem hefjast um helgina í Vancouver.   

Talið er að Janúkóvíotsj muni reyna að styrkja tengsl lands síns við Rússlands frekar en Evrópusambandið og Bandaríkin líkt og Viktor Jútsjenkó, fyrirrennari hans gerði.  

Í tilkynningu Hvíta hússins segir að samvinna Bandaríkjanna og Úkraínu byggist á sameiginlegum hagsmunum og gildum. Löndin vilji auka veg lýðræðis og bæta hag þegna sinna, tryggja öryggi og fullveldi landa, styrkja dómskerfi, og styrkja endurbætur á efnahagskerfi og orkukerfi Úkraínu.