Ráðhústorgið í Kaupmannahöfn. mbl.is/Brynjar Gauti

Fjórir karlmenn urðu fyrir skotum í Kaupmannahöfn í gærkvöldi þegar átök brutust út á þremur stöðum í borginni. Að sögn danskra fjölmiðla eru mennirnir allir af erlendu bergi brotnir. Tiltölulega rólegt hefur verið í borginni í vetur en sl. sumar og haust voru skotárásir nokkuð tíðar og tengdust oftast uppgjöri glæpahópa.

Berlingske Tidende segir, að skotbardagi á Kroghsgade á Austurbrú hafi ekkert tengst hinum málunum þremur. Um var að ræða rán sem mistókst en fjórir grímuklæddir menn sátu fyrir eiganda bjórkrár þegar hann hélt heim. Maðurinn veitti hins vegar mótþróa og í átökum var hleypt af skoti. 

Skömmu áður var hleypt af skotum í Heimdalsgade á Norðurbrú. Þar urðu tveir fyrir skotum og var annar, 22 ára karlmaður, fluttur á sjúkrahús en nokkrir vinir fóru men annan tvítugan karlmanna á Rigshospitalet þar sem þeir voru allir handteknir. Lögreglan segir að um hafi verið að ræða uppgjör glæpaflokka.  

Í gærkvöldi braust einnig út skotbardagi í Herlov og fékk 22 ár gamall maður skot í hálsinn og annar hryggbrotnaði. Tveir menn voru handteknir grunaðir um manndrápstilraun en skotgöt voru á bíl þeirra.  Lögregla telur einnig að þar hafi glæpaflokkar tekist á.