George Papandreou forsætisráðherra Grikklands. Reuters

George Papandreou, forsætisráðherra Grikklands, gagnrýnir viðbrögð Evrópusambandsins við efnahagskrísu landsins og segir áætlun sambandsins bæði alltof íburðarlitla og hæggenga. Þetta kemur fram á vef breska ríkisútvarpsins. 

Papandreou tjáði ráðherrum ríkisstjórnar sinnar á fundi sem sjónvarpað var beint í Aþenu að Evrópusambandið skorti samhæfingu og dregið væri úr trúverðugleika Grikklands.

Á fundi í Brussel í gær bauðst Evrópusambandið til þess að styðja við Grikkland, en ekki voru gefnar upp neinar ítarlegar upplýsingar um það í hverju aðstoðin myndi nákvæmlega felast.

Efnahagskrísan í Grikklandi hefur sett mikinn þrýsting á evruna og hefur orðið til þess að gengi hennar hefur veikst.

Við komuna heim til Grikklands sagði Papandreou að þó Grikkland hefði fengið stuðningsyfirlýsingu í Brussel þá hefðu frestir og ósamhljóðar yfirlýsingar síðustu mánaðar gert hlutina enn verri.

Papandreou sakaði stofnanir Evrópusambandsins, ráðherraráðið og fulltrúa sambandsins í Evrópska seðlabankanum um skort á samhæfingu.

Í kjölfar fundarins í Brussel í gær létu leiðtogar innan Evrópusambandsins hafa eftir sér að grísk stjórnvöld verði að taka efnahag landsins fastari rökum og lækka fjárlagahallann um 4% á þessu ári.

Fjárlagahallinn á Grikklandi stefnir í 12,7% á þessu ári sem er fjórum sinnum meira en leyft er á evrusvæðinu. Papandreou lagði eftir fundinn áherslu á að Grikkir væru reiðubúnir að taka þau nauðsynlegu skref sem krafist er til þess að ná fjárlagahallanum niður. Sem lið í því hefur ríkisstjórnin tilkynnt að laun opinberra starfsmanna verði fryst og eftirlaunaaldur hækkaður. Þau áform vöktu hörð viðbrögð Grikkja sem efndu til verkfalls í gær.

Fjármálaspekingar benda á að Þýskaland, sem stendur mjög sterkt innan evrusvæðisins, gæti veitt Grikkjum aukna aðstoð með því að kaupa grísk ríkisskuldabréf eða tryggja lánalínur.

Leiðtogar Evrópusambandsins virðast hika við að kalla eftir aðstoð Alþjóðagjaldeyrissjóðurinn til handa Grikklandi enda mynd slíkt hafa neikvæða áhrif á ímynd evrunnar.