Dómari á Haiti hefur sleppt lausum 10 bandarískum trúboðum sem sakaðir eru um að hafa ætlað að fara með 33 börn frá landinu án leyfis. Dómarinn segir að rannsókn málsins sé þó ekki lokið.

Fólkið var handtekið við landamærin við Dóminíska lýðveldið þegar það reyndi að fara með börnin úr landi. Þau héldu því fram að börnin væru munaðarlaus, en síðar kom í ljós að meirihluti þeirra átti foreldra á lífi.

Áður en dómarinn sleppti trúboðunum hafði hann hlustað á vitnisburð frá foreldrum sumra barnanna sem sögðu að þau hefðu afhent Bandaríkjamönnunum börn sín vegna þess að þau hefðu ekkert húsaskjól og ættu ekkert til að borða. Fram kom að leiðtogi hópsins Laura Silsby, trúboði frá Idaho, hefði fyrir tilviljun hitt prest á Haiti sem hefði hjálpað henni að safna börnunum saman. Hún viðurkenndi að að hún hefði ekki gengið frá neinum pappírum um að börnin mættu fara úr landi.