Þúsundir hindruðu göngu nýnasista í borginni Dresden í Þýskalandi í dag. Gangan hefur verið farin árlega til að minnast þess er bandamenn sprengdu borgina í heimstyrjöldinni síðari.

Hópur nýnasista hafði safnast saman fyrir utan Neustadt járnbrautastöðina þar sem svo nefnd „jarðarfaragangna“ átti að fara fram að loknum ræðuhöldum. Rúmlega 15,000 mótmælendur göngunnar hindruðu að fjöldafundurinn færi fram.

„Í fyrsta skipti hefur okkur tekist að hindra stærstu göngu nýnasista í Evrópu,“ sagði Lena Roth sem fer fyrir samtökunum Dresden án nasistanna, sem er bandalag stjórnmálamanna, listamanna og sameiningarsinna.

Andstæðingar fjöldafundarins höfðu hvatt íbúa til að taka þátt í friðsamlegum mótmælum og hindra gönguna í að eiga sér stað. Segja borgaryfirvöld 15.000 manns hafa myndað mannlega keðju, hinum megin árinnar Elbe til að hindra gönguna.

Talsmaður ráðhússins sagði þetta táknræna athöfn sem sýndi að Dresden væri borg sem væri opin öllum heiminum, og væri andsnúin ofbeldi og kynþáttahatri. 

Mikil löggæsla var í borginni vegna ótta við að upp úr syði milli andstæðra fylkinga. Eitthvað var um minniháttar pústra og voru um 30 manns úr báðum hópum voru handteknir. 

Sprengjum rigndi yfir Dresden í febrúar 1945, en borgin hafði fram að því gott sem sloppið við árásir. Um 25,000 manns létust í árásunum sem gerðu Dresden að rjúkandi rúst.