Joe Biden, varaforseti Bandaríkjanna, hyggst fara í opinbera heimsókn til Miðausturlanda snemma í mars og m.a. leggja leið sína til Ísraels, Palestínu, Egyptalandi og Jórdaníu. Þetta kemur fram í tilkynningu frá Hvíta húsinu.

Biden hyggst á ferðalagi sínu funda með Benjamin Netanyahu forsætisráðherra Ísraels, Mahmud Abbas leiðtoga Palestínumanna, Salam Fayyad forsætisráðherra Palestínu, Hosni Mubarak forseta Egyptalands og Abdullah konungi Jórdaníu.

Samkvæmt upplýsingum frá talsmanni Hvíta hússins mun varaforsetinn ræða framkomnar hugmyndir um tvíhliða ríki. Nánari upplýsingar var ekki að fá úr Hvíta húsinu.

Ferð Bidens kemur í framhaldi af því að stjórn Barack Obama forseta reynir að blása lífi í friðarviðræður milli Ísraela og Palestínumanna rúmu ári eftir að Obama tók við forsetaembættinu.

Egyptaland og Jórdanía eru einu tvö nágrannalönd Ísraels sem hafa undirritað friðarsamkomulag við Ísraela og hafa á umliðnum árum gengt lykilhlutverki í því að miðla málum milli Ísraela og Palestínumanna.

Hillary Clinton, utanríkisráðherra Bandaríkjanna, lét fyrr í dag hafa eftir sér í opinberri heimsókn til Katar að hún væri vongóð um að hægt væri að hefja alvöru viðræður milli Ísraela og Palestínumanna á þessu ári.

Í gær lét Clinton hafa eftir sér að hún væri vonsvikin vegna þess hversu treglega gengið hefði að koma friði á milli Ísraela og Palestínumanna, en bætti við að Bandaríkjamenn gætu ekki þröngvað friðarlausn upp á þjóðirnar.