Nicolas Sarkozy Frakklandsforseti upplýsti í dag að ríkisstjórn hans hyggst breyta eftirlaunakerfinu í Frakklandi, en stjórnmálaspekingar segja að með þessu sé hann að taka allnokkra pólitíska áhættu.

Áður hafði Sarkozy fundað með fulltrúum verkalýðsfélaganna í Elysee-höllinni. Hann sagði að lagafrumvarp sem fæli í sér breytingar á eftirlaunum opinberra starfsmanna yrði lagt fyrir þingið snemma í september nk.

„Við höfum ekki lengur efni á því að slá þessari ákvörðun á frest,“ sagði hann.

Ríkisstjórn Sarkozys  vinnur nú að því að finna leiðir til þess að hækka eftirlaunaaldurinn, sem í dag er 60 ár, með þeim rökum að það sé eina leiðin til þess að halda hinu rausnarlegu eftirlaunakerfinu á floti.

„Ákvarðanirnar verða teknar snemma haust og ríkisstjórnin mun leggja fram lagafrumvarp,“ sagði Sarkozy.

Líkt og í öðrum Evrópulöndum stefnir í óefni í Frakklandi þar sem eftirlaunaþegum fjölgar stöðugt á sama tíma og færri koma út á vinnumarkaðinn og því vandséð hvernig fjármagna eigi eftirlaunin.

Samkvæmt heimildum úr stjórnarráðinu er allt útlit fyrir að tekjuhalli opinbera eftirlaunasjóðsins verði nærri 11 billjón evrur.

Í frönskum dagblöðum er talað um að endurbæturnar á eftirlaunakerfinu sé grundvallarslagur fyrir Sarkozy, sem er ekki alltof vinsæll fyrir en vinsældir hans mælast í botni nú þegar hann er að hefja seinni helminginn af kjörtímabili sínum sem forseti.

„Forsetinn er ekki með öllum mjalla. Hann ætlar að sigrast á Himalaja franskra stjórnmála, þ.e. breytingarnar á eftirlaunakerfinu,“ segir Francis Brochet stjórnmálaskýrandi hjá dagblaðinu Progres de Lyon.

Ekki hefur mátt ræða það að hækka eftirlaunaaldurinn í Frakklandi, en hann hefur verið 60 ár síðan 1982. Á sínum tíma var það Francois Mitterrand, sósíalískur forseti, sem kom því kerfi á.

Víðs vegar um Evrópu, þar sem sama vandamál blasir við, hefur verið brugðist við því með því að hækka eftirlaunaaldurinn upp í 65 ár. Þetta hefur m.a. verið gert í nágrannalöndum Frakklands, þ.e. í Þýskalandi og á Spáni.

Eftir fund sinn með forsetanum funduðu forsvarsmenn sex stærstu verkalýðssamtakanna landsins og ræddu m.a. um skipulag mótmælaaðgerða hugsanlega í næsta mánuði. 

Ný skoðunarkönnun sem birt var í dag leiðir í ljóst að rúmlega helmingur Frakka stefnir að því að fara á eftirlaun á aldursbilinu 60-64 ára, en 40% sögðust ætla að vinna fram yfir 65 ára aldur.

Um 28% svarenda sögðust sammála því að hækka ætti eftirlaunaaldurinn, en 21% sögðust þeirrar skoðunar að  frekar ætti að hækka lögbundnar greiðslur í lífeyrissjóði.