Módel af nýjustu gerð Prius tvinnbílsins í sýningarsal Toyota í Tókýó. Reuters

Toyota verksmiðjurnar tilkynntu í dag að allar nýjar gerðir bíla þeirra verði búnar öryggiskerfi sem slekkur á vél bílsins við tilteknar aðstæður. Þessi búnaður á að koma í veg fyrir að stjórnlausir bílar valdi slysum. Tilkynningin kemur í kjölfar innköllunar milljóna bíla framleiðandans.

Toyota tilkynnti einnig að Akio Toyoda forstjóri muni leiða hóp sem fær það verkefni að auka gæðaeftirlit og gera hinum risastóra framleiðanda kleift að bregðast hratt við tilkynningum um galla í framleiðslunni. 

Nýi hemlunarbúnaðurinn sem eftir er að kynna um allan heim mun slökkva á vél bílsins ef samtímis verður stigið á bremsufetilinn og eldsneytisgjöfina. 

Meira en 30 banaslys í Bandaríkjunum eru rakin eru til bílar juku skyndilega ferð, án þess að bílstjórinn vildi það. Þessi stærsti bílaframleiðandi heims stendur nú frammi fyrir fjölda dómsmála sem gætu kostað hann milljarða bandaríkjadala.

Toyoda forstjóri sagði á blaðamannafundinum að fyrirtæki hans hafi aldrei reynt að fela öryggisvandamál. Bandarísk stjórnvöld kanna nú hvort nógu fljótt hafi verið brugðist við með innköllun bíla sem kunna að hafa verið gallaðir.

„Ef við finnum vandamál þá förum við ekki í felur. Við höfum ekki leynt upplýsingum og það munum við heldur ekki gera í framtíðinni,“ sagði Toyoda, en hann er barnabarn stofnanda bílaverksmiðjanna.

Toyota er einnig að rannsaka mögulegan galla í aflstýribúnaði Corolla bíla, sem er mest selda gerð framleiðandans. Ef galli reynist vera í búnaðinum verða bílarnir innkallaðir, að sögn  Shinichi Sasaki aðstoðarforstjóra. Hann sagði að innan við hundrað kvartanir hafi borist og leiddu þær til rannsóknarinnar.

Akio Toyoda, forstjóri Toyota, hélt blaðamannafund í morgun þar sem hann tilkynnti um aðgerðir Toyota verksmiðjanna. Reuters